Исторический музей "Наша Эпоха"Главная страницаКарта сайтаКонтакты
Наша Эпоха
Наша Эпоха Наша Эпоха Наша Эпоха
   

Царский молитвослов

 

Тропари, избранные кондаки и величания равноапостольным, благоверным Царям и Великим Князьям

 

 

ТРОПАРИ, ИЗБРАННЫЕ КОНДАКИ И ВЕЛИЧАНИЯ
РАВНОАПОСТОЛЬНЫМ БЛАГОВЕРНЫМ ЦАРЯМ И ВЕЛИКИМ КНЯЗЬЯМ

 

Тропарь Борису, во св. Крещении Михаилу, блгв. царю (Болг.; память 2/15 мая), глас 6:

Исполнен страха Божия / и Крещением святым просвещен, / был еси жилище Святаго Духа, / благоверный царю Борисе. / Утвердив же веру Православную на земли Болгарстей / и жезл царствия оставив, / вселился еси в пустыню, / процвел еси в подвизех / и обрел еси благодать пред Господем. / Ныне же предстоя Престолу Всевышняго, / моли даровати нам, молящимся тебе, / спасение душ наших.

Тропарь Вел. Кн. Владимиру, во св. крещ. Василию (память 15/28 июля), глас 4:

Уподобился еси купцу ищущему добраго бисера, / славнодержавный Владимире, / на высоте стола седя матере градов, / богоспасаемого Киева, / испытуя же и посылая к Царскому Граду / увидети православную веру, / обрел еси безценный бисер Христа, / избравшего тя яко втораго Павла, / и оттрясшаго слепоту во святей купели, / душевную вкупе и телесную. / Темже празднуем твое успение, / людие твои суще: / моли спастися душам нашим.

Кондак Вел. Кн. Владимиру, во св. крещ. Василию, глас 8:

Подобствовав великому апостолу Павлу, в сединах, всеславне Владимире, вся, яко младенческая мудрования, яже о идолах тщания оставль, яко муж совершенный, украсился еси божественнаго крещения багряницею; и ныне Спасу Христу в весели предстоя, моли спастися державы Российския начальником и множеству владомых.

Величание:
Величаем тя, / святый равноапостольный великий княже Владимире, / и чтим святую память твою, / идолы поправшаго и всю Российскую землю Святым Крещением просветившаго.

Тропарь царю Константину и матери его царице Елене (память 21 мая/3 июня), глас 8:

Креста Твоего образ на Небеси видев / и, якоже Павел, звание не от человек прием, / в царех апостол Твой, Господи, / Царствующий град в руце Твоей положи, / егоже спасай всегда в мире молитвами Богородицы, / едине Человеколюбче.

Кондак царю Константину и матери его царице Елене, глас 3:

Константин днесь, с материю Еленою, крест являют Всечестное Древо, всех убо Иудеов посрамление суще, оружие же на противныя верных Царей: нас бо ради явися знамение велие и во бранех грозное.

Величание:
Величаем вас, / святии благовернии и равноапостольнии царие Константине и Елено, / и чтим святую память вашу, / вы бо святым Крестом / всю вселенную просветили есте.

Тропарь Вел. Кн. Российской Ольге, во св. крещ. Елене (память 11/24 июля), глас 1:

Крилами Богоразумия вперивши твой ум, / возлетела еси превыше видимая твари, / взыскавши Бога и Творца всяческих, / и Того обретши, паки рождение крещением прияла еси: / древа животнаго наслаждающися, / нетленна вовеки пребываеши, Ольго приснославная.

Кондак Вел. Кн. Российской Ольге, во св. крещ. Елене, глас 4:

Воспоем днесь Благодетеля всех Бога, прославльшаго в России Ольгу богомудрую, да молитвами ея подаст душам нашим грехов оставление.

Величание:
Величаем тя, / святая равноапостольная княгине Ольго, / яко зарю утреннюю в земли нашей возсиявшую, / и свет веры православныя народу своему предвозвестившую.

 

ТРОПАРИ СВЯТЫМ ЦАРСТВЕННЫМ СТРАСТОТЕРПЦАМ

Тропарь Св. Царю-Мученику Николаю II (память 4/17 июля и в воскресенье после 25 января ст.ст., Собор новомучеников и исповедников Российских), глас 5:

Царства земнаго лишение, узы и страдания многоразличная кротко претерпел еси, свидетельствовав о Христе даже до смерти от Богоборцев, страстотерпче великий, Боговенчанный царю Николае, сего ради мученическим венцем на небесех венча тя с Царицею, и чады, и слуги твоими Христос Бог, егоже моли помилобати страну Российскую и спасти души наша.

Тропарь святым Царственным страстотерпцам (память 4/17 июля и в воскресенье после 25 января ст.ст., Собор новомучеников и исповедников Российских), глас 4:

Днесь благовернии людие светло почтим Седмерицу честную Царственных страстотерпец Христову Едину домашнюю церковь: Николая и Александру, Алексия, Ольгу, Татиану, Марию и Анастасию. Тии бо уз и страданий многоразличных не убоявшеся, от богоборных смерть и поругание телес прияша и дерзновение ко Господу в молитве улучиша. Сего ради к ним с любовию возопиим: О святии страстотерпцы, гласу покояния и стенанию народа нашего вонмите, землю Российскую в любви к Православию утвердите, от междоусобныя брани сохраните, мир мирови у Бога испросите и душам нашим велию милость.

Кондак, глас 8:

Избрании Царем Царствующих и Господем господствующих от рода Царей Российских благовернии мученицы, муки душевныя и смерть телесную за Христа приимшии, и венцы небесными увенчавшиися, к вам яко покровителем нашим милостивым с любовию благодарне вопием: Радуйтеся, Царственнии страстотерпцы, за Русь святую пред Богом усерднии молитвенницы.

Величание:
Величаем вас, святии Царственнии страстотерпцы, и чтим честная страдания ваша, яже за Христа претерпели есте.

 

ТРОПАРИ БЛАГОВЕРНЫМ ВЕЛИКИМ КНЯЗЬЯМ

Александру Невскому (в схиме Алексию), блгв. Вел. Кн. (память 23 ноября/6 декабря и 30 августа/12 сентября), глас 4:

Яко благочестиваго корене / пречестная отрасль был еси, блаженне Александре, / яви бо тя Христос яко некое Божественное сокровище Российстей земли, / новаго чудотворца преславна и Богоприятна. / И днесь сошедшеся / в память твою верою и любовию, / во псалмех пениих радующеся славим Господа, / давшаго тебе благодать исцелений. / Егоже моли спасти град сей, / и стране нашей Богоугодней быти, / и сыновом Российским спастися.

Тому же святому (Перенесение мощей, память 30 августа/12 сентября), глас 4:

Познай свою братию, российский Иосифе, / не в Египте, но на Небеси царствующий, / благоверный княже Александре, / и приими моления их, / умножая жита людем плодоносием земли твоея, / грады владычествия твоего ограждая молением / и православным Христианом на сопротивныя споборствуя.

Величание (на успение блгв. Вел. Кн. Александра Невского):
Величаем тя, / благоверный княже Александре, / и чтим святое успение твое, / и ныне молиши за нас / Христа, Бога нашего.

Андрею Боголюбскому, блгв. Вел. Кн. (память 4/17 июля), глас 8:

Яко благоверен и праведен, / за любовь Христа Бога от своих смерть приял еси, / кровь свою пролияв, / яко же прежде сродницы твои и страстотерпцы Борис и Глеб, / ихже кровем совопиет и твоя кровь, святе, к Богу, / якоже Авеля и Захарии праведных, / благоверный страстотерпче, великий княже Андрее, / с нимиже Христа Бога моли о стране нашей, еже Богоугодней быти / и сыновом российским спастися.

Георгию (Юрию) Всеволодовичу Владимирскому, блгв. Вел. Кн. (4/17 февраля), глас 8:

На высоте великаго княжения седя, / явился еси, благочестием и верою сияя отечеству своему, яко солнце; / по Свя¬тей Троице ревностию разжегся / и за веру крепко пострадав, кровь твою пролиял еси. / Тем и отсеченная твоя за Христа глава свидетельствует яве о тебе, / прилепшая по смерти к телеси твоему, / с нею же и до днесь нетленны пребывают мощи твоя, / от нихже источаеши исцеления душам и телесем нашим. / Но яко дерзновение имея ко Христу, страстотерпче Георгие, / непрестанно моли державу твою и сродник твоих / безвредну сохранити молитвами твоими.

Елисавете Феодоровне, Вел. Кн., прмц. (память 5/18 июля и в воскресенье после 25 января ст.ст., Собор новомучеников и исповедников Российских)

Смирением достоинство княжеское сокрывши, / богомудрая Елисавето, / сугубым служением Марфы и Марии / Христа почтила еси, / Милосердием, терпением и любовью себе предочистивши, / яко жертва праведная Богу принеслася еси. / Мы же, чтуще добродетельное житие и страдания твоя, /яко истинную наставницу усердно просим тя: / святая мученице великая княгиня Елисавето, / моли Христа Бога спасти и просветити души наша.

 

ТРОПАРИ БЛАГОВЕРНЫМ КНЯЗЬЯМ, СТРАСТОТЕРПЦАМ, ПРЕПОДОБНЫМ

Андрею Смоленскому, блгв. кн. (память 27 октября/9 ноября), глас 8:

Блаженство Евангельское возлюбив, / Богомудре княже Андрее, / чистоту сердца девством почтил еси / и, суету мира сего презрев, / устремился еси зрети Бога, / Иже тя прослави чудесы / во врачевании различне страждущих. / Сего ради молим тя: / проси нам у Христа Господа / всяких скорбей избавления / и получение Царства Небеснаго.

Анне Кашинской, блгв. вел. кн. (память 2/15 октября и 12/25 июня), глас 3:

Днесь восхваляем тя, преподобная мати, / великая княгине инокине Анно: / яко бо лоза плодовита посреде терния, / процвела еси во граде Кашине твоими добродетельми, / всех удивила еси чуд¬ным твоим житием, / темже Христу Богу угодила еси, / и ныне, радующися и веселящися, / пребываеши с лики преподобных жен, / наслаждающися райския красоты и веселия. / Молим убо тя, моли о нас / Человеколюбца Христа Бога нашего, / даровати нам мир и велию милость.

Величание:
Ублажаем тя, / преподобная мати, великая княгине Анно, / и чтим святую память твою, / наставнице инокиням / и собеседнице Ангелом.

Анне Новгородской, блгв. кн. (память 10/23 февраля), глас 1:

От запада возсиявши, яко звезда небосветлая, / прияти Православную веру сподобилася еси, / в нейже плод благославный Русской земле принесши, / святая благоверная княгине Анно, / Христа всем сердцем возлюбила еси, / Того оправдания и законы хранящи; / темже днесь всесвятую твою память празднующе, / грехов оставление молитвами твоими приемлем.

Борису и Глебу, во св. Крещении Роману и Давиду, блгвв. кнн., страстотерпцам (память 24 июля/6 августа и 2/15 мая), глас 4:

Мученическою кровию порфиру окропивше светло, / украшени предстоите, страдальцы славнии, Царю Безсмертному, / и, венцы славы от Него приимше, / молитеся стране нашей подати на враги одоление / и душам нашим велию милость.

Тем же святым (Перенесение мощей, память 2/15 мая), глас 4:

Днесь церковная расширяются недра, / приемлющи богатство Божия благодати, / веселятся русстии собори, / видяще преславная чудеса, / яже творите приходящим к вам верою, / святии чудотворцы Борисе и Глебе, / молите Христа Бога, да спасет души наша.

Василию и Константину Ярославским, блгвв. кнн. (память 3/16 июля и 8/21 июня), глас 2:

Ваше отечество хвалится обагрением кровей ваших, / Церковь же Божия радуется, / приемши телеса ваша, / людие, песненный лик составльше, / духовною цевницею вопиют: / ликуй, Василие, радуйся, Константине, / Ярославлю славо и всей России радосте.

Величание:
Величаем вас, / страстотерпцы Христовы, благовернии князи Василие и Константине, / и чтим честная страдания ваша, / вы бо молите за нас / Христа Бога нашего.

Владимиру Ярославичу Новгородскому, чдтв., блгв. кн. (память 4/17 октября), глас 4:

Измлада явился еси, Богомудре княже Владимире, / Божественный сосуд из¬бран Богови, / благочестием воспитан, веру непорочну соблюл / и, храм пречуден Премудрости Божия в Великом Новеграде сем устроив, / тело Твое в Нем предложил еси, / и ныне, на Небесех предстоя Престолу Святыя Троицы, / молися ниспослати и нам велию и богатую милость.

Владимиру и Агриппине Ржевским, блгвв. кнн. (память 14/27 июля), глас 8:

Яко благочестиваго корене пречестная отрасль был еси, / добре во благочес¬тии пожив, блаженне Владимире, / тако и с супружницею твоею, прехвальною Агриппиною, / в мире Богу угодивше, и преподобных житию сподобистеся. / С нимиже молитеся Господеви / сохранити без вреда отечество ваше, / да вас непрестанно почитаем.

Величание:
Ублажаем вас, / святии чудотворцы Владимире и Агриппино, / и чтим святую память вашу, / вы бо молите за ны / Христа Бога нашего.

Всеволоду, во св. Крещении Гавриилу, Псковскому, блгв. кн. (память 11/24 февраля, 22 апреля/5 мая, 27 ноября/10 декабря), глас 4:

Из млада явился еси, богомудре княже Гаврииле, / Божественный сосуд, избран Богови, / благочестием воспитан, веру непорочну соблюд / и многи святыя церкви устроив, / изгнание претерпел еси от своих, / якоже и целомудрии прародители твои от брата убиение. / С нимиже предстоя Святей Троице, / молися Державе Российстей сохраненной быти / и всем нам спастися.

Тому же святому (Обретение мощей, память 27 ноября/10 декабря), глас 4:

Наста днесь всечестный новый праздник, / обретение честных мощей блаженнаго князя Гавриила, / веселящи изрядно всех благочестивых множества, / темже, вси вернии, сошедшеся во святый храм Живоначальныя Троицы, возопием: / блаженне княже Гаврииле, / имея дерзновение ко Христу Богу, / моли спастися празднующим любовию память твою.

Величание (на обрет. мощей блгв. кн. Всеволода (Гавриила):
Ублажаем тя, / благоверный княже Гаврииле, / и чтим обретение честных мощей твоих, / и ныне молиши за нас / Христа, Бога нашего.

Вячеславу Чешскому, блгв. кн. (память 28 сентября/11 октября, 4/17 марта), глас 4:

Днесь Ангели с человеки радуются вкупе общим веселием. / Небо и земля светло ликуют в память ти, святе. / И мы, грешнии, прилежно ти вопием: / помолись к Владыце о нас, избавити ны от напасти, видимых и невидимых враг, / чтущих пресветлую ти память.

Глебу, во св. крещении Давиду, блгв. кн. (память 5/18 сентября, 24 июля/6 августа, 2/15 мая), глас 4:

Мученик Твой, Господи, / спасшеся веры ради, / княже Глебе, / труждающимся быстрый помощник / и ненадежным надежа. / Ты бо болезни врачуеши притекающим к тебе с верою. / Темже и мы верою молимся / от бед избави нас, / чтущим любовию память твою.

Глебу Владимирскому, блгв. кн. (память 20 июня/3 июля), глас 4:

Днесь светло красуется славнейший град Владимир, / имея в себе пребогатое сокровище -
/ чудоточащия честныя мощи благовернаго князя Глеба, / имиже украшаяся и хваляся, / вселенную всю созывает к веселию / и велегласно вопиет: / о Владыко Христе, / даровавый таковую благодать угоднику Твоему, / его молитвами помилуй нас.

Глебу Всеволодовичу Городенскому (иже в Киеве), блгв. кн. (память 6/19 июля), глас 2:

В постничестве от юности добре подвизався, Богомудре, / ум на враги мужески вооружив, / оружием крестным сих победил еси, / твердомудростная повлача, в душу вложи свою. / Темже похваляем тя, княже наш Глебе, / яко постником ты еси удобрение, / Киеву - слава / и всей Русстей земли - утверждение.

Даниилу Московскому, блгв. кн. (память 4/17 марта, 30 августа/12 сентября), глас 3:

Явился еси стране нашей яко звезда пресветлая, / благоверный княже Данииле, / лучами света твоего озаряя град твой и обитель твою, / людем православным поборник еси, / пленным свободитель и нищим защититель, / моли Христа Бога / державе Российстей даровати мир / и спасти души наша.

Димитрию Донскому, блгв. вел. кн. (память 19 мая/1 июня), глас 3:

Велика обрете в бедах тя поборника земля Русская, / языки побеждающа. / Якоже на Доне Мамаеву низложил еси гордыню, / на подвиг сей прияв благословение преподобнаго Сергия, / тако, княже Димитрие, / Христу Богу молися / даровати нам велию милость.

Димитрию Угличскому и Московскому, блгв. Царевичу (память 15/28 мая, 3/16 июня), глас 4:

Царскую диадиму обагрил еси кровию твоею, / богомудре мучениче, / за скиптр крест в руки приим, / явился еси победоносец, / в жертву непорочну Владыце принесл еси себе, / яко бо агнец незлоблив от раба заколен еси, / и ныне радуяся предстоиши Святей Троице. / Молися о державе сродников твоих богоугодней быти / и сыновом Российским спастися.

Тому же святому (Перенесение мощей, память 3/16 июня), глас 8:

Днесь вельми хвалится царствующий град Москва, / имея в себе праведныя твоя мощи, / благоверне царевиче Димитрие, / яко цвети благоуханнии, / пребываеми во святем храме, / просвещение подают душам и телом нашим. / Тем радостно тя восхваляем, / и честное пренесение мощей твоих верно почитаем, и молим тя: / моли Христа Бога даровати нам велию милость.

Довмонту, во св. Крещении Тимофею, Псковскому, блгв. кн. (память 20 мая/2 июня), глас 8:

Иже отчее нечестие возненавидев, / преблаженне княже Довмонте, / и нощи страстныя избег, еже к идолом тщание, / прииде мыслию к Солнцу славы - Христу, / озарився благодатию Божественнаго Крещения, / и ныне во свете Пресвятыя Троицы предстоя, / моли Христа Бога сохранити и спасти православныя люди / и град твой от безбожных агарян, / и латин нашествия, и междоусобныя бра¬ни/и спастися душам нашим.

Игорю Черниговскому и Киевскому, блгв. вел. кн. (память 19 сентября/2 октября, 5/18 июня), глас 4:

Наста днесь всечестная память страстотерпца благовернаго князя Игоря, / созывающая люди в пречестный храм Спасов, / идеже радостно сошедшася благочестивых множество / молитвенно празднуют святую память твою, и с верою взывают ти: / молися, святе, / Стране Российстей, граду Чернигову и всем православным Христианом / в мире и благоденствии спастися.

Величание:
Величаем тя, / страстотерпче святый княже Игоре, / и чтем святую память твою, / ты бо молиши о нас / Христа Бога нашего.

Иоанну Угличскому, в иночестве схим. Игнатию, Вологодскому, блгв. кн. (память 19 мая/1 июня), глас 2:

В житии своем многи скорби претерпел еси, блаженне, / и терпения ради венец от Бога приял еси, / и по смерти своей чудотворец показался еси, / того ради память твою песньми почитаем, / преподобне отче наш Игнатие, / молися, предстоя Святей Троице, / державе сродник твоих Богоугодней быти / и сыновом Российским спастися.

Константину (Ярославу) и чадом его Михаилу и Феодору, Муромским чдтв. (память 21 мая/3 июня), глас 4:

Константин днесь весело ликовствует, / предстоя Престолу Пресвятыя Троицы, / видя отечествие свое, мастию духовною сияющее: / емуже последоваша Михаил и Феодор, сынове его, / и молятся вси трие вкупе о душах наших.

Лазарю, блгв. кн. Сербскому (память 15/28 июня), глас 3:

Красоту возжелев славы Божия, / в земней Тому благоугодил еси / и, порученный ти талант добре возделав, усугубил еси, / о немже и подвизався до крове. / Отонудуже и мзду болезней твоих, / яко мученик, приял еси от Христа Бога: / Егоже моли спастися / поющим тя, Лазаре.

Михаилу Тверскому, блгв. кн. (память 22 ноября/5 декабря), глас 8:

Возвысив ум твой к Богу, / и жития со Ангелы возжелел еси, / тленную славу земную оставил еси, блаженне, / и поло¬жил еси душу твою за люди твоя, / восприял еси венец противу трудов твоих, Богомудре Михаиле, / моли Христа Бога о чтущих любовию святую память твою.

Величание:
Величаем тя, / благоверный княже Михаиле, / и чтим святую память твою, / иже за Христа кровь свою излиял еси, / и ныне молиши за нас / Христа, Бога нашего.

Мстиславу, во св. Крещении Георгию, Храброму, Новгородскому, блгв. кн. (память 14/27 июня), глас 4:

Измлада явился еси, Богомудре княже Мстиславе, / Божественный сосуд, избран Богови, / благочестием воспитан, / веру непорочну соблюл еси. / Темже предстоя Святей Троице, / молися стране Российстей сохраненной быти / и всем нам спастися.

Николе Святоше, кн. Черниговскому, прп., Печерскому чудотворцу, в Ближних пещерах (память 14/127 октября и 28 сентября/11 октября, Собор прпп. отцев Киево-Печерских, в Ближних пещерах (прп. Антония) почивающих), глас 2:

Отечество и славу княжения твоего оставил, / Князю смирения, Христови, усердно последовал еси, / преподобне отче наш Николо; / тем приял еси от Него вечное царство и славу на небеси, / идеже ликуя, поминай нас чтущих память твою верно.

Олегу Брянскому, блгв. кн., прп. (память 20 сентября/3 октября), глас 8:

От юности возлюбив Христа всем сердцем, преподобне, / славу земную, яко преходящу, оставил еси / и царство земное в ничтоже вменивше, / лику инок радостно причелся еси / и труды многими град Брянск, аки солнце пресветло, озарил еси: / тем, быв Троицы украшение, / моли, княже Олеже, Христа Бога, спастися душам нашим.

Петру, во иночестве Давиду, и Февронии, во иночестве Евфросинии, Муромским чдтвв., блгвв. кнн. (память 25 июня/8 июля), глас 8:

Яко благочестиваго корене пречестная отрасль был еси, / добре во благочестии пожив, блаженне Петре, / тако и с супружницею твоею, премудрою Феврониею, / в мире Богу угодивше / и преподобных житию сподобистеся. / С нимиже молитеся Господеви / сохранити без вреда отечество ваше, / да вас непрестанно почитаем.

Величание:
Ублажаем вас, / святии чудотворцы Петре и Февроние, / и чтим святую память вашу, / вы бо молите за ны / Христа, Бога нашего.

Роману (Олеговичу) Рязанскому, блгв. кн. (память 19 июля/1 августа), глас 1:

Мученьми странноужасными / и доблестию терпения / всех преудивил еси, княже Романе: / честных бо членов твоих по составом резание / и всего телесе твоего раздробление / претерпел еси за веру Христову. / Темже и возшел еси к Престолу Царя Христа Бога / и явился еси новый предстатель Церкве Рязанския. / Молися убо ко Господу, / да мир и благоденствие дарует граду нашему, / и испроси у Него милость и спасение / чтущим священную память твою, многострадальне.

Роману Угличскому, блгв. кн. (память 3/16 февраля), глас 4:

От младенства явился еси, право¬верный княже Романе, / избран от Бога / благочестия столп необорим, / веру непорочну соблюл еси, / молитвами и милостынею и постом Богу угодил еси; / темже и по смерти явися светлость жития твоего, / исцеляеши бо недуги немощствующих, / верою притекающих ко святому твоему гробу. / Сего ради вопием ти: / радуйся, угодниче Божий Романе, / града Углича похвало и утверждение.

Ростиславу-Михаилу, блгв. вел. кн. (память 14/27 марта), глас 6:

Обрете тя строителя градов и церквей / земля Киевская, / великий княже Ростиславе, / смуты устранял еси, единство храня, / темже Господь тебе мудрость низпосла, / сего ради Христу Богу молися / спастися душам нашим.

Тамаре, Царице Грузинской, блгв. (память 1/14 мая и в Неделю свв. жен-мироносиц), глас 4:

Во святых дивная, / Иверии светило, / благоверная Царице Тамаро, / на горах высоких храмы воздвигшая, / да в них моления возсылают ко Господу, / мольбами твоими крепость даровавшая воем христолюбивых людей страны Иверския, / десницею же своею полчища агарянская ниспровергшая, / моли Христа Бога / спастися душам нашим.

Феодору Ярославичу, Владимирскому, блгв. кн. (память 23 июня/6 июля), глас 8:

В жизни сей утвердися верою, / в заповедех Господних пребываше непреклонен, / благоугодих Тому, яко благочестив самодержец / Емуже подобяся о врученных ти христоименитых людех, / душу свою положити потщався, / в землю идяше всезлую и безбожную / и тамо, пред нечестивым мучителем Христа дерзновенно исповедав, / мученический венец прият, / темже, премудре Феодоре Ярославиче, / Избавителя моли избавити от бед отечество твое и люди, / да тя вси непрестанно почитаем.

Феодору Ярославичу, Новгородскому, блгв. кн. (память 5/18 июня), глас 8:

От благочестиваго корене отрасль благочестивая прозябл еси / и, скончався в юности, лета долга твоими добродетельми исполнил еси, / благоверный княже Феодоре, / сего ради Владеющему временами молимся, / да молитвами твоими подаст нам долготу лет / и низпослет стране нашей велию и богатую милость.

Феодору Смоленскому, блгв. кн. (память 19 сентября/2 октября и 5/18 марта), глас 4:

Яко целитель преизряден и казатель благоприятен / мирский мятеж оставил еси / и крест свой на рамо взем / и божественным житием пожил еси и воздержанием плоти украсился еси / к тебе притекающим сосуд избранный показа тя, всеблаженне Феодоре, / воспевающих твою память в псалмех и песнех, преподобне, / молися о душах наших.

Феодору Смоленскому и чадам его Давиду и Константину, блгв. кнн. (память 19 сентября/2 октября и 5/18 марта), глас 4:

От юности вашея Христове любви прилепившеся, святии, / усердно закон и оправдания Того сохранисте, / отонудуже и чудесными дарованьми обогатившеся, / исцеления источаете, Феодоре, Давиде и Константине, / с верою вас почитающих, / молите Христа Бога, / спастися душам нашим.

Тем же святым (Обретение мощей, память 5/18 марта), глас 4:

Измлада явистеся святии, / Богомудре Феодоре и блаженне Давиде с Константином славным, / Божественнии сосуди, избраннии Богови. / Ныне же источаете нам многа исцеления от честных мощей ваших, / вся ереси потопляюще, / и спасающе присно град свой, / и всех верных сохраняюще невредимо / от видимых и невидимых враг. / Темже верою молим вас, святии: / молите Христа Бога / в мире сохранитися нам и спасти души наша.

Тем же святым (Перенесение мощей, память 19 сентября/2 октября), глас 8:

Яко звезды многосветлыя от юности возсиявше, / осветили есте сердца верных пренесением честных мощей ваших, / во плоти, яко Ангелы на земли показастеся, / пощением насаждени бысте яко древа, при водах воздержания, / напоени струями слез ваших, и скверну омысте. / Сего ради явистеся приятелища Божия Духа, / Феодоре, и Давиде, и Константине, / молите Христа Бога, спастися душам нашим.

Феодору Стародубскому, блгв. кн. (память 21 июня/4 июля), глас 1:

Божественным желанием от юнаго возраста весь сам себе Господеви возложив, / в молитвах и постех образ был добродетели, / богатство же, и славу, и доброродство телесное яко не сущее презрев, / Христа единаго от души возлюбил еси, / и Того Истиннаго Бога пред нечестивым царем исповедал еси, / и доблестию терпения своего сего ужасил / и всех преудивил еси. / Телом бо, яко розга, обрезаемь, / на кийждо состав, удеси резания / благодарны молитвы изрек еси Господеви. / Тем во страдании своем венец прием, / к Престолу возшел еси славы / и со Ангелы предстоиши, всехвальне Феодоре, / моли Христа Бога спастися душам нашим.

Ярополку, во св. крещ. Петру, кн. Владимиро-Волынскому, блгв. (память 22 ноября/5 декабря), глас 4:

Яко благоверен и праведен, / за любовь Христа Бога от своих смерть приял еси, Ярополче, / страстотерпче святый, благоверный княже Волынский, / и пролиял еси кровь твою, / якоже прежде сродницы твои и страстотерпцы, Богоблаженнии Борис и Глеб, / ихже подвигом ревнуя благочестно, / Господеви взывал еси усердно: / даруй ми кончину, якоже братиям моим, / да и аз омыю грехи моя кровию моею / и избавлюся мира сего тщетнаго и мятежнаго. / Темже, днесь сошедшеся в память твою, / верою и любовию славим Господа, / укрепившаго Тебе в подвизе напрасныя смерти, / яко же бо агнец незлобивый, / от раба заколен еси, / и себе самаго жертву непорочну Господеви принесл еси, / Егоже моли, присноблаженне, / спасти Отечество твое / и сыновом Российским спастися.

 




Вернуться

Copyright © 2009 Наша Эпоха
Создание сайта Дизайн - студия Marika
 
Версия для печати